Ботаничка градина во Скопје 

Дали знаевте дека во главниот град на нашата држава, постои ова зелено место во кое се собрани преку 450 видови на тревести, грмушести и дрвенести растенија кои се наоѓаат во надворешниот дел, но и со многу други ретки ендемични видови од македонската флора кои се распределени зависно потребите кои ги имаат низ просторот кој припаѓа на оваа ботаничка градина.

Оваа градина постои 71 година, а истата е под раководство на ПМФ, а во моментов со неа раководи професор д-р Рената Ќуштеревска и М-р Цветанка Цветкоска со тимот вработени.

Освен што се трудат да ги сочуваат и негуваат растенијата кои се дел од оваа градина, тимот постојано учествува на проекти и работи на колекционирање и заштита на ендемични видови карактеристични за ова поднебје.

СТРУКТУРА

Ботаничката градина има еден голем стакленик во којшто се наоѓаат огромен број на тропски и суптропски растенија, а е и просторија за изведување на научни работилници за деца од основните училишта, но и студентите од факултетот.

Покрај големиот стакленик, има и мал стакленик, како и објект за аклиматизација на ретки и ендемични растенија, но и за зачувување на биодиверзитетот и автохтоната вегетација од овие простори

Покрај сите овие работи, има и три оранжерии и објект за лековити ароматични и зачински растенија.

Во надворешениот простор има отворен објект кој служи за предавања и едукација во потоплите денови.

ОТВОРЕНОСТ ЗА ПОСЕТИТЕЛИ

Ботаничката градина е отворена за посетители и групи со претходна најава.

Вработените сметаат дека е место со голем туристички потенцијал, но е навистина малку експонирана и е потребно многу повеќе да се инвестира како во материјал, така и во работна сила, бидејќи со зголемувањето на проектите и активностите, времето за сработување на основните работни задачи се крати, а најмногу трпи живиот свет – растенијата.

Во прилог оставаме да погледнете фотографии од оваа рајска градина и да посакате уште утре да ја посетите.

НАПОМЕНА:

Авторот има исклучиво материјално право да го користи своето дело и да дозволува или забранува користење на делото за: издавање, репродукција,дистрибуција вклучувајќи и изнајмување.
Секое прекршување на авторското право ќе биде пријавено и ќе се постапува согласно законот.